Jaana Anjaana

This one's special for 2 reasons:

1. I get to tease my dad about getting old!

2. I wrote a (sort of) proper poem in hindi for the first time.

So, if you like this one let me know in the comments and don't forget to share and subscribe!

Please play the audio and listen along for the full experience.

In garmiyon ki chutti mein hum papa ke gaon gaye the,

Kuch purani yaadein taaza karne gaye the,

Kuch purane yaaron se bade din baad milne gaye the.

Ab mauka bhi tha, aur dastur bhi,

To bachpan ke kahaniyon ka pitara to khulna hi tha,

Aur mai bhi kaise na sunti,

Jab mukhya kirdaar mere hi jaan pehchan ka tha?

Hairaani ki baat to ye thi ki

Jaana pehchana insaan bhi anjaana lag raha tha,

Mai to sirf Rajnandan ko jaanti thi,

Yaha to kisi Raja babu ki baat ho rahi thi.

Tab to padosi ke ped se ber tod ke khate the,

Aaj shayad umr ka lihaj rakhte hue bazaar se hi le aate hai.

Tab to chup chup ke dosto se bike chalana seekhte the,

Aur aaj hume car mein ghumate hai.

Tab to kapde gande hone par dadaji ki daant khate the,

Aur aaj har shirt pant press karke hi pehente hai.

Ha lekin sab kuch nahi badla hai.

Aaj bhi dudh na peene ke bahane dhundte hai,

Aur aaj bhi unhe wahi dal chawal roti bhante hai.

Jitne shiddat se na jaane kyu homework aur padhai karte the,

Utne hi shiddat se aaj kaam karte hai.

Tab aur aaj ke beech mein 25 saal guzar gaye.

In garmiyon ki chutti mein hum papa ka gaon gaye,

Aur Raja babu se Rajnandan baane ka unka safar samajh gaye.